مصراوي سات تو  


اليكم العرض الاقوى : سيرفر مصراوى سات تو العالمى الفاتح لجميع باقات العالم 2018 لمعرفة المزيد اضغط هنااااااااااا

الاشتراك بسيرفر مصراوي تو

الاشتراك بسيرفر مصراوي تو

الاشتراك بسيرفر مصراوي تو

  #1  
قديم 01-15-2016, 10:34 PM
الصورة الرمزية يوسف محمود النجار  
يوسف محمود النجار
۩۞۩ادارة مصراوى سات تو۩۞۩
  يوسف محمود النجار غير متواجد حالياً  
رقـم العضويـة: 29539
تـاريخ التسجيل: May 2015
الإقـــــــامــــة:
المشاركـــــات: 1,907 [+]

سهم تزييف التاريخ بين الحقيقه والخيال

وا اسلاماه
(انتى فين يا انشراح)
=============
بعد نشر مقالى السابق عن الفيلم الخالد الناصر صلاح الدين .. نالنى من سهام التقريع و الاذى و المهانه ما طال امى و
ابويا شخصياً بالفاظ غير لائقه بالمره .. و كأنى غلطت فى البخارى .. لا و الله .. بل كأنى اعتقلت البخارى نفسه و بلغت عنه امن الدوله.
بعض الناس تعاملت مع المقال بأسلوب "اقتلوا حامل الرساله" .. حامل الرساله لا يفقه شيء عن محتوياتها المنافيه للأداب .. هو فقط يحملها .. مش مشكله .. نقتله و نستمتع بكل قاذورات الرساله و كاتبها.
سابوا الفيلم بكل ما فيه ما بلاوى و اخطاء .. و مسكوا فى اسئلتى المنطقيه البريئه جدا .. رغم تأكيدى فى بداية المقال على حبى للمخرج و العمل نفسه.
احباط كبير جدا .. لدرجة انى فكرت الغى الفكره كلها .. اللى عايز يقرا يقرا .. و اللى مش عاوز .. هو حر .. هو انا يعنى حسنى عبد الرحمن الجبرتى ؟؟
لكن تواصل معايا بعض الاخوه من اصحاب الاخلاق النظيفه و الالسنه المنقوعه فى السكر و مية الورد .. و الهمونى الكثير من الصبر و الامل .. مصرنا ان شاء الله بخير .. حتى و ان طفا على السطح بعض الشوائب.
زى ما بقول دايما .. انا مش باحث تاريخى .. انا فقط قريت كلام مختلف عن اللى شفته .. ان اصبت فلله الفضل و المنه و له الحمد و الشكر .. و ان اخطأت فاتوقع التصويب لا التقريع متشفعا بما فى نيتى من تصحيح الاخطاء التاريخيه.
تمام كده ..؟
استعنا على الشقى بالله .. اعتذر عن طول الموضوع .. لكن التفاصيل مهمه .. اخر المقال موجود كل المصادر .. كلها متاحه فى مكتبة جروب سطور للمراجعه و الاطلاع.
:::::::::::::::::::: :::::::::::::::::::: :::::::::::::::::::: :::::::::::::::::::: ::::::::::::::
الحلقه التانيه فى كشف المستور من الاخطاء التاريخيه فى الدراما المصريه .. بأكد تانى .. الرساله دى للجمهور مش لصناع الفيلم .. الحقيقه فى الكتب .. ما تراه امامك على الشاشه ما هو الا اكشن اغلبه محصلش.
معادى النهارده مع الفيلم الخالد .. وا أسلاماه
يا دين النبى .. أحمد مظهر برضه
طب و النعمه مش مقصوده .. هو الراجل علشان كان حريف فى ركوب الخيل فكانوا بيجيبوه فى كل الافلام اللى فيها خناقات على مستوى عالى و كده.

أحمد مظهر .. انا كنت ولا زلت بحبه جدا .. بحس انه ابن ناس كده و جنتل .. كان ظابط جيش .. رئيس اتحاد الفروسيه فى يوم من الايام .. راجل زى الفل.
الفيلم بقى .. لا .. مش هتفق معاه.
الفيلم عن قصة وا أسلاماه للأديب الكبير على احمد باكثير.
الفيلم غير الروايه .. و الروايه غير الواقع .. و الواقع اسود و مهبب على اجيال بتتربى على افكار مش صحيحه .. و هتكبر على اكاذيب .. و تنقل الاكاذيب بمنتهى الحماس لجيل تانى و تالت و رابع.
اللى مش مصدقنى .. عندى صوره لأنتونى كوين .. الناس بتتداولها على اساس انها صورة عمر المختار .. اكتر من مليون شخص مقتنعين بالكلام ده.
و ملايين تانيين مقتنعين ان سلامه مشى فى السوق يقول انتى فين يا جهاد .. وير ار يو ماى دارلنج.
:::::::::::::::::::: :::::::::::::::::::: :::::::::::::::::::: :::::::::::::::::::: ::::::::::::::
وا اسلاماه اتصور سنة 1961 ...انتاج مصرى ايطالى مشترك ... المخرجين طلاينه "اندرو مارتون" مع مساعد مصرى .. القصه لعلى أحمد باكثير .. الحوار ليوسف السباعى .. الجيش ساعد الانتاج بكتيبة عساكر ..لزوم الاكشن و الحرب و كده.

لكن للأسف .. مجموعه ارزقيه اجتمعوا على تاريخنا و اغتصبوه سينمائيا بمنتهى القسوه... فحملت رؤوسنا سفاحا بافكار خربانه من افلام مزيفه للتاريخ و مشوهه للابطال اللى معادش حيلتنا غير سيرتهم نتفشخر بيها قصاد دول العالم .. كبرنا على افكار اونطه ... ابطال مجاهدين افتكرناهم بتوع ستات و خلفاء عظام انجازاتهم اندفنت بكلمات الراقصات و ارباب كئوس الخمر.
كل ده علشان الحبكه و شباك التذاكر و التطبيل للى قاعد على الكرسي .. الشيء لزوم الشيء ... علشان يطلعوا الفلوس من جيوبنا ... لازم شوية اكشن ... قصة حب ... مشاهد خارجه و الفاظ ... رقص و عرى و مسخره .. كل حاجه الا التاريخ الحقيقى...
اصل ملوش زباين.
:::::::::::::::::::: :::::::::::::::::::: :::::::::::::::::::: :::::::::::::::::::: ::::::::::::::
بدأ الفيلم بمشهد السلطان جلال الدين بن خوارزم شاه و هو بيموت و بيوصى ابنته و ابن اخته الامير محمود بالجهاد و بيسلمهم لخادم اسمه سلامه.
.
اول القصيده عك
==========
الامير قطز و الاميره جهاد اتخطفوا من عساكر التتار و اتباعوا فى سوق العبيد .. يعنى مكانش فى سلامه و لا العلامه اللى بالنار على كتف جهاد و جو الدراما الرخيص ده.
.

ثانيا : اركع يا اقطاى
===========
قالك بقى ان تحيه كاريوكا .. شجر الدر يعنى .. وقفت كده بعظمه و خيلاء .. و راحت بصاله بصه حريمى جباره .. و قالتله اركع يا اقطاى .. اخشع ياض لاشقك.
و اقطاى اتاخد من المفاجأه .. ازاى و هو فتوة المماليك البحريه يتعلم عليه كده من حرمه .. فقفش بقى و اتضايق .. قامت هى رفضت الجواز منه .. ماهو كده معناها ان هو سى السيد .. و هى قويه و مفتريه و فيمينيست و عايزه راجل تمشيه على مزاجها.
ده الفيلم .. الواقع بقى حاجه تانيه خالص.
الامير فارس الدين اقطاى الجمدار القائد العام للجيوش المصريه بعد مقتل الامير فخر الدين يوسف اتابك الجيش فى معركة المنصوره ضد الحمله الصليبيه السابعه بقيادة لويس التاسع.
اقطاى دافع عن المنصوره مع قائد قواته المقاتل القبجاقى "كازاخستان حاليا" الفذ الشرس بيبرس البندقدارى.
بعد وفاة الملك الصالح نجم الدين ايوب .. عرض الامير عز الدين ايبك و الأمير فارس الدين اقطاى الزواج على الملكه شجر الدر عن طريق ارسال مندوبين عنهم .. لا يصح طبعا رفض طلب ليهم فى مواجهتهم و هم من هم.
قطز اتكلم عن لسان عز الدين ايبك و بيبرس اتكلم عن لسان فارس الدين اقطاى .. قطز لبس ثوب العاشق و بيبرس لبس ثوب المقاتل .. الستات هما الستات .. شجر الدر اختارت ايبك و نفضت لأقطاى.
و تلاقيها قفشت الهدايا من الاتنين .. من زمان يا جدعان و الشبكه مبترجعش *‎grin‎* رمز تعبيري
.. ياللا .. هتروح من ربنا فين.
يعنى اقطاى اساسا مراحش القصر علشان يركع وللا يرفض .. تلاقيه بس كان بيقفلها تحت الشباك و هى تشغله اغانى تامر الأغا حسنى او عمرو الدين دياب اتابك المغنواتيه فى مصر المملوكيه.
فضل فارس الدين اقطاى فى خدمة المملكه المصريه بأخلاص بعد وصول ايبك للحكم .. مش كده و بس .. لا .. ده كمان اخمد محاوله للأنقلاب حاول يعملها الناصر يوسف "حاكم دمشق" فى الشام.
و لكن اقطاى مقدرش ينسى ان كان بينه و بين العرش خطوه .. فقرر السعى من تانى عن طريق تقوية نفوذه فى الشام و الاسكندريه و الصعيد و ضمهم الى اقطاعاته .. و بالتالى زاد نفوذ المماليك البحريه فى الدوله ..
ايبك قلق من محاولات اقطاى المستمره لمحاصرته .. فقرر قطع رأس الثعبان اللى بدأ فعلا يطوق جسد القاهره.
ايبك حط خطه لقتل فارس الدين اقطاى.
ايه بقى الخطه دى ؟؟

ثالثا : قطز هو اللى قتل اقطاى
==================
ايبك اتفق مع قطز .. مملوكه الاول و بعض المماليك التانيين اللى بيدينوله بالولاء "المماليك المعزيه" على قتل اقطاى .. طبيعى يا جدعان .. ما هو اقطاى مكانش سهل علشان يأجروله واحد يجيب رقبته .. ده كان قائد الجيش .. فى ايام كانت فيها الحروب اساسها القوه البدنيه.
يعنى اقطاى دخل الجيش علشان كان شديد مش علشان ابوه كان لواء .. و مش بس دخل الجيش .. ده كان قائد الجيوش كلها .. يعنى صحه و طول بعرض و قوه تهد جبل.
فكانت الخطه كالاتى .. اقطاى ييجى القلعه للتباحث حول كيفية سد خرم الاوزون "اى كلام يعنى" .. و هو خارج من القلعه فى ظلام الليل .. حد يديله بالخنجر فى جنبه .. مش علشان يقتله طبعا .. اقطاى مش هيموت من طعنة خنجر .. طعنة الخنجر بس تهد حيله شويه.. تهد قواه .. علشان لما يطلعله قطز .. مياخدش فى ايده كتير و يبقى قتله سهل .. و مع ذلك اقطاى مكانش بالسهوله دى و كاد ان يقتل قطز .. لكن قطز هو كمان مكانش هفأ و قدر يخلص فى الليله.
كانت شديده اوى الناس دى.
يعنى ببساطه .. قطز هو اللى قتل اقطاى .. بالاتفاق مع السلطان عز الدين ايبك .. و بعدها رموا راسه للماليك البحريه "رجالة اقطاى" اللى كانت واقفه حوالين القلعه .. وروهم العين الحمرا يعنى .. قام المماليك دول عرفوا ان ملهمش لقمة عيش فى البلد دى .. فقالوا يا فكيك .. منهم اللى راح على سوريا و منهم اللى راح الكرك .. من ضمن المماليك اللى هربت .. بيبرس البندقدارى و قلاوون الالفى .. و الاتنين رجعو مصر بعد ما ايبك اتقتل ..و الاتنين بقوا سلاطين على مصر .. ماهى كانت ميغه بقى.. قلاوون الالفى "اسم الالفى على اساس انه كان مملوك اشتروه بألف دينار" اسس اسره استمرت في الحكم اكتر من 100 سنه .. و مازالت مدرسته قائمه فى شارع المعز بالقاهره.
ملحوظه سريعه كده.
هو مين فخر الدين اقطاى ده ؟؟ اللى نعرفه اسمه فارس الدين اقطاى .. جابوا فخر الدين دى منين ؟؟
تكونش المماليك كانت بتدلع فارس و تقوله يا فخر ؟؟ زى ما بنقول لمصطفى يا درش او لمحمود يابو حنفى ؟؟
جايز.
.

رابعا : شجر الدر ماتت غرقانه فى البيسين
==================== ======
حد يقدر ينسى المشهد العظيم ده ؟؟
بتكلم جد فعلا .. مشهد عظيم جدا .. لسببين :-
اولا .. صوت الطاووس المرعب بعد ما الحريم خلصوا على بعض .. فعلا ما زلت لحد النهارده بتقبض لما بسمع صوته .. مكنتش اتخيل ابدا ان الكائن الجميل بشده ده يطلع منه الكآبه دى كلها.
ثانيا .. اتنين ستات بيقطعوا بعض .. فى ايه فى الدنيا اجمل من كده .. كل ما اشوف ستات بتتخانق و تشد شعر بعض .. بموت من السعاده .. علطول اقول اللهم اضرب الظالمين بالظالمين .. ولا تخرجهم منها ابدا .. لا سالمين ولا حتى متعورين *‎grin‎* رمز تعبيري
فى الفيلم ..زوجة ايبك الاولى الست ام على (المنصور) دفعت رشوه لفريد شوقى علشان يسيبها تقتل ضرتها شجر الدر .. و فريد شوقى عمل فيها مرشد من بتوع الحكومه و حب يقبض من شجر الدر و ينصب على الوليه التانيه .. شجر الدر حلقتله .. فراح جاى ملبسها فى الحيطه و دخل عليها ام على و راح جاى قافل عليهم الباب من بره بالترباس .. و ام على راحت جايباها من شعرها فى مشهد يطرب له القلب و دفست راسها فى الميه زى كفار قريش .. صحيح يا ولاد .. الضره مره و لو كانت جره.
ده الفيلم .. الحقيقه بقى موضوع تانى خالص.
ايبك كان وعد شجر الدر باشراكها فى الحكم .. طبعا الكلام ده فى الخطوبه .. بعد الجواز لحس كلامه و ركنها على الرف تماما .. رجاله تكسف .. مش كده و بس .. ابن اللذينا كان عاوز يتجوز التالته كمان .. صحته مساعداه بقى .. بنت الامير بدر الدين لؤلؤ حاكم الموصل.
شجر الدر ست مش سهله .. وجهتله دعوه باسلوب انا اسفه يا بيبى مش هزعلك تانى .. الجدع صدق و راحلها القلعه و مستحمى و متظبط .. قامت هى اللى ظبتطه مع حراسها و قتلوه .. و اعلنت انه مات موتة ربنا .. مماليكه طبعا مدخلش عليهم الكلام ده ..قبضوا عليها و سلموها الى غريمتها الاشهر .. ام على زوجة ايبك الاولى .. الست مكدبتش خبر و أمرت جواريها بقتلها بمنتهى المهانه .. الضرب بالقباقيب على راسها حتى الموت .. و بعدين رموها جثتها من على اسوار القلعه و فضلت 3 ايام من غير دفن.
الحريم لما بتقدر على بعض مبتخليش الصراحه .. احسن .. طالما الخناقه حريمى .. يبقى طوبه على طوبه و خلى العاركه منصوبه. *‎grin‎* رمز تعبيري.
و ابتهاجا بقتل شجر الدر .. ام على وزعت على الناس اطباق لبن بفتافيت العيش المحمص و السكر و المكسرات و الزبيب.. و سموا الطبق ده على اسمها ... ام على *‎grin‎* رمز تعبيري.
يقال ان قطع الزبيب دى كانت قطع من صدر شجر الدر اللى قطعته ام على.
.
خامسا : المنصور .. ابويا ابويا
=================
فاكرين العيل العبيط اللى صدق ان احمد مظهر بلع حصانه و قعد يصرخ و يدبدب فى الارض و يقول ابويا ابويا؟؟
ارموا بقى الواد ده من دماغكو خالص .. ابن ايبك كان اسمه نور الدين على .. تولى الحكم بعد مقتل ابوه و كان سنه 15 سنه .. و بقى اسمه الملك المنصور .. مكانش عبيط ولا اهبل و لا اى حاجه من اللى قالتهم تحيه كاريوكا دى .. دى غيرة نسوان مش اكتر علشان الواد يبقى ابن ضرتها.
بعد مقتل ايبك .. المماليك اللى كانت هربت للشام رجعت مصر تانى علشان تلحق اى حاجه من طبق الفته .. فوجئوا ان سلطان مصر طفل سنه 15 سنه .. ملوش فى اى حاجه فى الدنيا الا تربية الحمام و صراع الديوك "الهندى" و الجرى بالحمير فى القلعه.
اتفقوا مع الملك المغيث ملك الكرك "الايوبى" و حاولوا يعملوا قلق و ياخدوا السلطنه .. لكن قطز وقفلهم زى الاسد .. بيرد جميل اميره السابق ايبك فى ابنه المنصور .. مش كده و بس .. لا .. قطز كمان قدر يأسر المملوك قلاوون الالفى.
يعنى المنصور مكانش اهبل يا جدعان .. هو بس كان طفل ملوش فى صراع العروش و الحرب و الكلام ده.
.
سادسا : و نكلم مين لما نحب نكلم الشعب المصرى
==================== ==========
ان ان ااااااان
أحمد مظهر : تقدر تتكلم معايا
رسول التتار : لكن انت مين ؟؟
احمد مظهر : واحد من الناس
لمؤاخذه .. الجمله الاخيره دى فلتت .. واحد من الناس ده بتاع كريم عبد العزيز .. فى الفيلم بتاعنا قاله انه واحد من شعب مصر .. اللهم صلى على النبى .. واحد من الشعب و طلع اتكلم كده.
رسل التتار ابلغوا احمد مظهر بمطالبم .. دهب و عبيد و قطعه من ارض مصر .. احمد مظهر اتعصب .. اتنرفز .. و راح مقطع الرساله و زعق فى الجدع بتاع التتار
"كتبغاااااا ... لو تجرأ تترى واحد و حط رجله على ارض مصر .. هيكون التمن .. حياته" ... كااااااااااااااااات.
نقف هنا بقى.
ايه بقى الكلام ده ؟؟؟
حطوا الفيلم على جمب شويه .. و نشوف ايه اللى حصل فى الحقيقه.
هولاكو وصل بغداد فعلا و جاب رقبة اخر خلفاء بنى العباس المستعصم بالله و عملوا البلاوى المشهوره فى بغداد .. انهارت الخلافه العباسيه .. وقنها كان الناصر يوسف اخر ملوك بنى ايوب فى الشام و الملك المغيث ملك على الكرك فى فلسطين و المنصور ملك على مصر.
الناصر يوسف قالك يا عم الجماعه التتار دول شداد اوى انا مش ادهم .. راح باعت ابنه العزيز الى هولاكو و معاه كبشة هدايا زى الفل و طلب منه مساعدته فى الاستيلاء على مصر و عنيا ليك يا عم الحاج .. قعدنى انت بس على العرش و انا هشوفك.
هولاكو ادرك ان قصاده ملك مهزوم نفسيا .. فطلب منه 20 الف فارس علشان يساعدوه فى الاستيلاء على مصر و تبقى السلطنه من نصيب الناصر يوسف و هو بس هياخد حسنته .. كام مزه من مزز مصر و شوية دهب و عبيد و يرجع تانى بلدهم.
خطه سياسيه من داهيه اسمه هولاكو .. هيحارب اهل مصر بأهل الشام و عساكره هو تفضل سليمه .. ايا كان اللى هيكسب فيهم هيبقى مرهق من الحرب .. مش هياخد فى ايده غلوه .. و يبقي كسب الشام و مصر بأقل خساره ممكنه.
الناصر يوسف "العبيط فعلا" صدق الكلام ده .. الاخبار وصلت للمماليك الموجودين فى الكرك .. اللى كانوا هربوا بعد مقتل فارس الدين اقطاى .. المماليك ثاروا من خيانة الناصر يوسف.
عملوا ايه بقى الشجعان دول ؟؟
جريوا على الملك المغيث ملك الكرك و طلبوا منه مساعدتهم فى الاستيلاء على مصر قبل ما الناصر يوسف ياخدها!!
يا ولاد الجزمه !!! بقى بدل ما تتحدوا كلكوا ضد التتار .. بتتخانقوا على كرسى عرش مصر؟؟
ده على اساس انها انهار تفيض لبن و عسل .. دى زحمه و مقرفه و الدائرى فيها علطول مقفول و الاخوان و الجيش مقطعين بعض فيها.
و فعلا .. الملك المغيث بعت قوات الى مصر و لكنها انهزمت .. و اتأسر قلاوون الألفى و الباقى هربوا تانى على الكرك .. الملك المغيث حب يعمل اى مكسب يبرر الضرايب اللى فرضها على الناس فهجم على الناصر يوسف فى دمشق و لكنه فشل برضه ..
فى الاخر عملوا صلح .. بمقتضى الصلح ده الملك المغيث سلم المماليك اللى اتسببوا فى الفتنه دى كلها للناصر يوسف فى دمشق تسليم اهالى .. و طبعا الناصر يوسف عمل معاهم الجلاشه.
اما قطز ..فرجع الى قلعة الجبل و اعدم المماليك اللى ساعدت الملك المغيث ..
البلد فيها قلق و التتار على الابواب .. و المنصور يسبح فى مية البطيخ..
يعمل ايه قطز؟
استصدر فتوى من الشيخ الجليل العز بن عبد السلام بخلع المنصور .. و اخد موافقة الامراء على توليه السلطه لمواجهة التتار على ان يتركها بعد الحرب .. و فعلا خلعه و حبسه هو و اخوه و امه "ام على اللى أمرت بقتل شجر الدر" لأنها كانت راكبه على دماغ الواد فى الحكم .. و بعد كده نفاهم الى دمياط .. و بعد كده راحوا شمالا عبر المتوسط الى الارضى البيزنطيه.
دكتور جمال الدين الشيال فى كتابه تاريخ مصر الاسلاميه "طبعة دار المعارف سنة 1966"بيقول ان المنصور عاش هناك و تنصر و اصبح اسمه ميخائيل ابن ايبك و اكد الكلام ده شمس الدين الذهبى فى سير اعلام النبلاء (مجلد 23 - صفحة 200). بينما ابن اياس فى كتابه "بدائع الزهور فى وقائع الدهور" قال انه فضل عايش فى برج السلسله فى دمياط لحد ما مات سنة 700 هجريه (مجلد 1 - صفحة 78).
يعنى لما رسل التتار وصلوا الى ارض مصر .. قطز فعلا كان فى الحكم .. مش بس كده .. قطز اتصرف صح تماما .. قطع رقبة الرسل دى و علق جثثهم على ابواب زويله لزوم الروح المعنويه للجيش و جمع الامراء و بناء على فتوى القوى فى الحق الشيخ العز بن عبد السلام استولى على اموالهم لزوم بناء و تسليح الجيش .. تأميم يعنى.
يعنى الفيلم بتاع كلنا معاك .. كلنا معاك .. و يحيا السلطان .. و الاستفتاء اللى حصل و الحركه اللى عملها رشدى اباظه دى ايه .. اونطا ؟؟
اه يا معلم .. ولااااااا حصل منها اى بتنجان فى الحقيقه.
و بعدين رشدى اباظه اساسا راجل بتاع نسوان .. ماله هو و مال العرش و الحكم و الليله دى؟؟
كمان فى حاجه مهمه جدا.
كتبغا كان قائد جيوش التتار .. حاجه زى سامى عنان كده .. مش عسكرى مراسله .. عمل بلاوى فى جيش المسلمين فى المعركه .. لحد ما قتله امير اسمه جمال الدين آقوش الشمسي يوم 25 رمضان فى عين جالوت.
و بعدين التتار ملقوش رسل يبعتوها غير العيال الجعانه دى ؟؟؟ العيال كانت واقفه هتقع من طولها من الجوع .. بقى ده شكل مقاتلين ده!!
خد عندك يا سيدى .. ده جزء من نص رسالة هولاكو الحقيقيه الى قطز .. اقروا كده و شوفوا اللى يقول الكلام ده يبقى شكله عامل ازاى و قارنوهم بالهياكل العظميه اللى ظهرت فى الفيلم .. الرساله كامله ذكرها المقريزى فى كتابه "السلوك لمعرفة دول الملوك"
:::::::::::::::::::: :::::::::::::::::::: :::::::::::::::::::: :::::::::::::::::::: ::::::::::::::
يعلم الملك المظفر قطز .. وسائر أمراء دولته وأهل مملكته بالديار المصرية وما حولها من الأعمال .. أنا نحن جند الله في أرضه ..خلقنا من سخطه .. وسلطنا على من حل به غضبه. فلكم بجميع البلاد معتبر .. وعن عزمنا مزدجر .. فاتعظوا بغيركم وأسلموا لنا أمركم ..قبل أن ينكشف الغطاء .. فتندموا ويعود عليكم الخطأ .. فنحن ما نرحم من بكى .. ولا نرقّ لمن اشتكى .. وقد سمعتم أننا قد فتحنا البلاد ..وطهرنا الأرض من الفساد .. وقتلنا معظم العباد .. فعليكم بالهرب .. وعلينا بالطلب .. فأي أرض تأويكم .. وأي طريق تنجيكم .. وأي بلاد تحميكم؟

فما لكم من سيوفنا خلاص .. ولا من مهابتنا مناص .. فخيولنا سوابق .. وسهامنا خوارق .. وسيوفنا صواعق .. وقلوبنا كالجبال .. وعددنا كالرمال ..فالحصون لدينا لا تمنع .. والعساكر لقتالنا لا تنفع .. ومطركم علينا لايُسمع فإنكم أكلتم الحرام .. ولا تعفون عند كلام .. وخنتم العهود والأيمان ..وفشا فيكم العقوق والعصيان .. فأبشروا بالمذلة والهوان.
:::::::::::::::::::: :::::::::::::::::::: :::::::::::::::::::: :::::::::::::::::::: ::::::::::::::
يا خبر اسود على الكلام .. انا خفت و انا قاعد مكانى.
.
سابعا : اتفوو ... لو شفتوه فى الحرب اقتلوه
==================== =======
مين بلطاى ده يا جدعان ؟؟
فى الفيلم هو اللى قتل اقطاى .. و هو اللى قبض فلوس من ام على علشان تخلص على شجر الدر .. و كان جاسوس للتتار علشان ياخد العرش.
و النعمه الجدع ده ملوش ذكر فى اى كتاب من كتب التاريخ .. ولا حتى مجلات ميكى .. فريد شوقى فى الفيلم قتل اقطاى .. اللى هو محمود المليجى .. ده غالبا كان تار تاريخى بايت بينهم من افلام قبل كده.. هما علطول كده ناقر و نقير .. انما فى الخقيقه .. بلطاى ده اساسا مكانش له اى وجود.
و بعدين حرص الشخصيه الخياليه دى "بلطاى" على قتل جهاد علشان يبقى هو الحاكم الشرعى ...بأمارة ايه و لا مؤاخذه ... اذا كان التتار هياخدوا البلد باللى فيها .. يبقى شرعية ايه و بتاع ايه.
شوية منطق يا ناس.
.
ثامنا : الله احد .. الله الصمد
=================
لا يخلو الفيلم من الكوميديا الحقيقه .. احمد مظهر شاف 5 عساكر لابسين لبس فرسان المعبد ... فطلع يتفق معاهم وقتى كده انهم يشتركوا معاه فى حربه مع التتار .. فالراجل المسكين يا عينى قالله ان دول اللى فضلو من معركة المنصوره و مش هيقدر يخاطر بيهم .. عدد برضه يا جدعان.
دى الكفته .. قصدى ده الفيلم ...
الحقيقه بقى ان معركة المنصوره ... اخر معارك الحمله الصليبيه السابعه .. انتهت فى مايو سنة 1250 م بهزيمة جيوش لويس فى فارسكور "دمياط" و لويس التاسع اتقفش فى منية عبد الله .. اللى هى دلوقتى ميت الخولى عبد الله "مركز الزرقا - دمياط" ..و اتعلق من كعوبه فى دار القاضى ابراهيم ابن لقمان فى المنصوره.
بينما عين جالوت حصلت سنة 1260 م ... يعنى وقت الحرب مع التتار لويس كان دفع الفديه و رجع عكا و منها الى فرنسا علشان الامراء هناك يظبطوه على كل التكايف اللى اتصرفت على حمله مجابتش همها .. كمان بقايا الصليبيين فى الشام حاولوا يتفقوا مع التتار ضد المسلمين .. بس التتار نفضولهم ... على اساس انهم كفاءه كفايه.
يبقى مين اللى كانوا فوق الجبل دول و قالوله "الله .. بتاع مين ؟؟" و احمد مظهر اتضايق جدا .. ده على اساس ان مصر وقتها مكانتش تعرف ان فى ديانه اسمها المسيحيه!!!
الانبهار يقتلنى ببطء.
.
تاسعا : الى الجهاااااااااااد
===============
لبنى عبد العزيز .. فتاة الجامعه الامريكيه المثاليه .. اسمر يا اسمرانى .. تطلع فوق الزلطه الكبيره دى .. فوسط التراب و العفار و تمسك عصاية مقشه و تصرخ بصوت مش ماشى مع الصوره خالص و تقول .. وااااا اسلاماه .. الى الجهااااااااااد .. واااا اسلاماه !!
كده برضه يا مخرجين ؟؟
لما القطه دى تنزل الحرب .. امال هياتم تعملوا بيها ايه ؟؟
و يسمع النداء ده راجل ميت و راشق فى فضهره خازوق .. فيصحى و يجيب عسكرى تترى من فوق حصانه و يموته بطوبه فنافوخه.
دى لو كانت عاركه فى خماره بلدى .. كانت بقت اسخن من كده.
الاميره جلنار حب الرمان - و ده اسمها الحقيقى - بنت السلطان جلال الدين خوارزم شاه .. استشهدت فى اول المعركه خالص لما التتار كانوا ضاغطين على جيش المسلمين .. قطز شالها على دراعه و قالها "وا حبيبتاه .. وا زوجتاه" .. هى عرفت انها بتموت .. فقالتله "بل قل وا أسلاماه .. الى النصر يا سلطان المسلمين .. ها قد سبقتك الى الجنه" .. و فاضت روحها شهيده بين ذراعى زوجها.
الملك المظفر اغمض عينيها و رمى خوذته فى الارض و فك سرج الحصان و خلع درعه و انطلق زى السهم فى قلب جيش التتار صارخا .. وا محمداه .. وا أسلاماه.
فعلا وا أسلاماه .. التتار كانوا اكبر نكبه فى التاريخ على الاسلام .. طبعا مقارنة بحالنا دلوقتى .. احنا اسوأ من التتار على الاسلام نفسه و على البشريه كلها.. ربنا يفكها من عنده.
عسكريا .. نحلل الجزئيه دى .. لما قائد الجيش يخلع درعه و خوذته و يفك سرج حصانه .. معناها انه خلاص .. مش باقى على اى شيء .. ايده مش هتبقى مشغوله الا بالقتل و بس .. و لما ينفذ لوحده فى قلب جيش التتار ..تبقى دى رساله الى كل من خلفه . اعمل زيه او هتموت .. يا اما مهزوم بسيوف الاعداء لو مليكك اتقتل .. او متحاكم من مليكك على جبنك لو جيشك انتصر.
نفس الحركه تقريبا عملها الفريق الشهيد عبد المنعم رياض فى حرب الاستنزاف .. التواجد فى الخطوط الاماميه مع العساكر.
و معنويا .. لما يكون الملك و قائد الجيش مستبيع .. ده معناه ان التتار كان بينهم و بين النصر تكه .. و ده فعلا حقيقى ..خطة الهجوم كانت عباره عن تقسيم الجيش 3 اقسام .. قلب و ميمنه و ميسره .. القلب يتظاهر بالهزيمه فيتراجع .. يروح التتار يهجموا فيطبق عليهم الميمنه و الميسره "بقيادة بيبرس من غزه" .. كماشه يعنى ... اللى حصل بقى ان القلب فعلا انهزم فى الاول .. و حصل ارتباك فى الميمنه و الميسره الى ان انقذهم السلطان بصراخه .. وا أسلاماه.
كده يبقى المشهد مقبول.
.
عاشرا : يا بخته ... مش هيكمل حياته اعمى
==================== =======
كل اللى فات ده كوم .. و سلامه ده كوم تانى لوحده.
اساسا اساسا .. انا مبحبش حسين رياض .. و شايف انه ممثل سقيل جدا و اوفر على الاخر .. كفايه مشهده الكوميدى فى رد قلبى "تحيا الثوره .. انا بتكلم يا على".. لما بشوف فيلم فيه حسين رياض .. بكتئب .. يمكن الجدع ده كان من اسباب انى قررت احط على الفيلم ده.
بما ان فريد شوقى جاى فى السيناريو بالعافيه .. يبقى لازم حسين رياض كمان ييجى محبه و اخوه .. و اهو كله بيرزق.
الحقيقه بقى .. لا فيها سلامه .. و لا فيها انتى فين يا جهاد .. و لا انا هنا يا سلامه .. ولا حتى انجى بتاعة لازم تدفعلى اكتر .. لازم تدفعلى اكتر.. و شغل العبط ده كله.
انا حاسس انى عاوز اعمل زيه .. بس انا همشى فى الشوارع اقول انتى فين يا انشراح.
ملك مصر .. الملك المظفر سيف الدين قطز .. كان بيستعين بالشيخ العز بن عبد السلام "اللى هو عباس فارس فى الفيلم".. الرجل القوى .. و ده درس لمشايخ السلطان عن اهمية دور رجال الدين فى اسداء النصح للحكام .. لما رجل الدين بيصلح .. و يفضل بعيد عن العاب السياسه.. يقدر يكون حر فى قراره و فتواه .. لا يخضع الا لله عزوجل.
بالمناسبه .. بعد مقتل قطز .. الشيخ العز بن عبد السلام رفض الاعتراف "منفردا" بولاية بيبرس لانه مملوك .. و خرج من القاهره غاضب .. الناس خرجت وراه .. و اضطر بيبرس انه يتباع و يعتق علشان يبقى حر و تجوز له الولايه.
طيب ما كان قتله و خلصنا ؟؟
و هو كان يقدر ؟ ده كان اهل مصر فرتكوه.. الشيخ العز بن عبد السلام كان رجل علم و دنيا و دين .. يمكن اهم عند المصريين من السلطان نفسه.
نحسبه عند الله من المقربين ولا نزكى على الله احداً
.
أحد عشر : الاسامى بقى
================
قطز : طول الفيلم بيندهو بأسم محمود .. هو فعلا اسمه الحقيقى محمود ابن ممدود ...بس الاسم ده متعرفش الا لما اتقتل على ايد صديقه الاثير بيبرس البندقدارى .. و بيبرس اكتشف من مذكراته اصله و نسبه و انه كان ناوى يسيبله السلطنه بالفعل حسب الاتفاق المبرم بينهم وقت تولى قطز العرش.
جلنار : طول الفيلم بيندهوها برضه بأسم جهاد ... الحقيقه غير كده ... هى استخدمت اسم جلنار حب الرمان من اول ما اتباعت فى سوق الجوارى و متعرفش اسمها ولا نسبها الا لما استشهدت.
شجر الدر : شجر مش شجرة .. هى عصمة الدين و الدنيا ام خليل الحاكميه المستعصميه .. اعتقها الصالح نجم الدين ايوب و تزوجها .. تولت عرش مصر لمدة 80 يوم حتى استدعاء ابنه توران شاه.
اقطاى : هو فارس الدين اقطاى .. مش فخر الدين.
تم بحمد الله .. و لله الفضل و المنه .. و نراكم فى حلقه اخرى من حلقات كشف المستور فى النزهه و العبور بقلم الفقير لله أحمد حسنى *‎


 
التوقيع

 

 

----------------------------

مشاهدة جميع مواضيع::: يوسف محمود النجار

رد مع اقتباس
إضافة رد

مواقع النشر (المفضلة)

أدوات الموضوع إبحث في الموضوع
إبحث في الموضوع:

البحث المتقدم

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
[خبر] مصر تصنع التاريخ .. والسيسى يعيد أمجاد الماضى حسام مشعل ثورة 25 يناير 0 08-07-2015 11:53 PM


الساعة الآن 01:09 AM


Powered by vBulletin® Version 3.8.11
Copyright ©2000 - 2018, vBulletin Solutions, Inc.
www.masrawysat2.com
® جمــيع الحقوق محــفــوظة موقع مصراوي سات تو ®